Hindi naman dapat maging walang katapusan ang pagtatalo dito. Ang kailangan lang ay pag unawa sa lenggwahe, paraan ng pagluluto at pagkakasundo ng mga nagluluto.
Para sa maraming tao, ang pinakabasehan sa pangalan ng pagkain ay ang sangkap nito. Ngunit ang malimit nilang kaligtaan ay naipapangalan din ang pagkain sa paraan ng pagluluto nito tulad ng nilaga, inihaw at pinirito.
Ang kalituhan sa pagkilala kung ang isang putahe ay apritada, mechado, kaldereta at menudo ay nagmumula dahil ang mga pangalang ito ay hiram sa wikang banyaga (Kastila) at hindi na alam ng mga taong hindi sanay sa wikang kastila kung ano ang kahulugan ng mga ito. Ngunit ang pag unawa ng mga salitang ito ang maaaring makatulong sa pagtatapos ng kalituhan sa mga pagkaing maraming lito sa pangalan.
Apritada- may ugat na salitang 'prito'. Mula dito, maaari nating isipin ang isang pagkain na ipinirito muna bago ginawan, hinaluan at niluto sa sarsa.
Mechado - may ugat na 'mecha'o mitsa, tumutukoy sa paglalagay ng taba sa laman ng payating karne na para itong minimitsahan, bago iluto sa kung ano mang sarsa at paraan, pero karaniwan ay may sarsa.
Kaldereta - may ugat na 'kaldera', nagpapahiwatig na ang pagkain ay iniluto sabay sabay sa kaldera hanggang maghalo at magkaroon ng isang lasa ang mga halo.
Menudo - pakain na kung saan ang mga sangkap ay halos pantay pantay na hiniwa sa maliliit na piraso at iniluto ng mga sarsa.
Sa ganitong pag unawa, possible na makagawa ng iba't ibang putahe, depende sa mga sangkap at dagdag na estilo ng pagkakaluto.
No comments:
Post a Comment